MNF Treasurer Lalruatkima’n tun hnaia revenue minister-in Maumual-a ram neitu mi 456 hnenah Land Pass a sem kha field work zawng zawng MNF sorkar laia an thawh vek a ni a, ZPM-in thawh an nei lo tih a sawi.
Inrinnia Luangmual MNF Unit-in Luangmual Martar Thlanmuala ‘Hnam martarte sunna leh rammute chawimawina’ hun ‘Zo Kut’ an buatsaih chu Revenue Minister hlui, Lalruatkima hian a hmanpui a. Kum 1986-a Remna Thuthlung ziah a nih khan remna avanga lo chhuakte tan Maumual-ah mi 653 hnenah ram pek a ni a. Khatih lai khan tlemin a la ramhnuai deuh a, chei a nih mai bawk loh avangin MNF kaihhruai sorkar chuan April 2022 khan chei that a, chinfel tha an ti a. DM&R atanga Rs nuai 50 an hmuh hmangin chak taka hmalak a ni a, kawngpui laih a nih bakah ram teh that leh niin, in hmun 720 zet an teh chhuak a. Land Pass siam chu an peih hman ta lo a, a field work zawng zawng rawh an sorkar chhung khan an peih fel vek a, tuna ZPM kaihhruai sorkar chuan dawhkana chinfel ngai tel a zawng bak an thawk lo nia sawiin, “ZPM sorkar tih vek angah mi tam takin a ngai hi a dik lo a ni,” a ti.
Lalruatkima chuan “Mizo mipuiin ZPM kan enchhin hi kan inchhir tih a lang tawh a. Tun Dampa bial by-election atangin ram hruai leh tur kan teh a, party tinin theih tawp kan chhuah a. MNF candidate Dr R Lalthangliana thlan tlin a ni ta a ni,” tiin, kum 2028 inthlan pui neih tur hlimthla Dampa bial by-election-ah khan a lang chiang hle tih a sawi bawk.