Lawngtlai Bawrhsap Donny Lalruatsanga chuan tun hnaia Kakichhuah leh Hruitezawla tuihri nia hriat leng mekah khaw pahnihte hi containment area-ah puan a nih tawh thu a sawi.
Inrinnia a pisa-a chanchinbu mite a kawmnaah Lawngtlai Bawrhsap Donny Lalruatsanga chuan he thu hi a sawi a. Tuihri nia hriat leng mekah theihtawp chhuah a nih mek thu a sawi a. A bik takin Kakichhuah leh Hruitezawl chu ‘Containment area’-a puan a nih tawh thu a sawi.
Sr. CMO Dr Lalmuanawma Jongte kaihruaina hnuaiah medical team-ten an vil reng thu leh World Health Organisation (WHO) medical team leh Doctor without Borders-te pawh an lut tawh tih a sawi bawk.
Bawrhsap chuan chawlhkar khat chhung chu uluk leh zuala enkawl hnathawh a ni ang a, a tul dan a zirin sorkarah tanpuina lian zawk pawh ngen a nih tur thu a sawi a. December 1-ah ‘election team’ tirh chhuah a ngaih tawh dawn avangin freezone-a puan hman tura hmalak mek thu a sawi a. Tun dinhmunah ORS, IV drip, tui tihthianghlimna leh damdawi tul te pawh pek an nih thu leh mipuite chi-ai lo tur leh thianghlimna lamah theihtawp lo chhuah turin a chah.
Sr. CMO Dr. Lalmuanawma Jongte chuan hrileng mek chu zirchianna uluk zawka neih mek a nih thu a sawi a. November 11, 2025 khan hri leng chungchangah report dawn a ni a, mitthi hmasa ber hi November 4-ah niin thi zawng zawng hi mi paruk – refugee leh khawtual mi pathum ve ve an awm tawh tih a sawi a. A kaihhruaina hnuaiah ‘Rapid Response Team’ din tawh niin, hri leng darh lo tura chak taka hmalak a nih thu a sawi a. Damlo mi 71 endik tawh niin a tam zawk chu na lutuk an nih loh thu a sawi bawk.
Tui sample lak niin, ZMC&H-ah endik mek a nih thu sawiin, Salachhuah (Myanmar) atanga hri hi luta an ngaih thu a sawi bawk.