Bihar assembly inthlana an chet chhiat hle hnu leh ‘vote ruk’ nasa tak an aupui karah Congress party chuan Thawhlehni hian thutkhawm pawimawh a ko va. Hetah hian state in-charge, state unit chief, Congress Legislature Party leader leh electoral roll Special Intensive Revision (SIR) kalpui mekna state leh union territory 12-a secretary theuhte an tel dawn.
Bihar inthlanah chiang taka chak lova NDA-in bial 202 an lak lai leh an telna tangrual pawl, Mahagathbandhan-in MLA 35 chauh an nei tih a chian hnu, Inrinni khan Congress hian Election Commission (EC) chu inthlan an kalpui danah fel lo a awm tih an sawi chhuak a. Rahul Gandhi leh party chief Mallikarjun Kharge-a te telin hruaitu lawkte an thukhawm nghal bawk.
Party hruaitu lawk pakhat chuan Thawhlehnia thukhawmah hian AICC in-charge, Pradesh Congress Committee chief, Congress Legislature Party (CLP) leader leh SIR kalpui mekna state 12-a secretary theuhte an tel dawn thu leh Indira Bhawan, Delhi-ah neih a nih dawn thu a sawi.
Inrinni khan EC chuan SIR a kalpui leh mekah state pakua leh UT pathumah vote nei vaibelchhe 5.99 atangin 95% an endik a, felhlel a awm em tih an chian mek tih an sawi.
Ni tina SIR bulletin a tihchhuah inthlan thuneitu hian Chhattisgarh, Goa, Gujarat, Kerala, Madhya Pradesh, Rajasthan, Tamil Nadu, Uttar Pradesh, West Bengal, Puducherry, Andaman & Nicobar Islands leh Lakshadweep-ah enumeration form vaibelchhe 48.67 sem chhuah a nih tawh thu an tar lang bawk.
Heng state zingah hian Tamil Nadu, Puducherry, Kerala leh West Bengal hi nakuma inthlang tur an ni.
Assam-ah pawh nakumah tho an inthlang dawn a, electoral roll ennawn hun tur erawh a hrana la puan tur a ni thung.
SIR Phase II hi November 4 atang khan kalpui tan a ni a, December 4-ah zawh fel tura ruahman a ni.
Zirtawpni khan Gandhi-a chuan Bihar inthlan result chuan a barakhaih hle tih a sawi a, inthlan chu a tir phat atangin a felhlel (fair lo) a tih thu a sawi a. Congress leh INDIA-a tangrualten ril takin result hi an zir chiang dawn tih a sawi bawk.
Congress hian result chu rinhlelh rual lohvin ‘prime minister, home minister, EC ten an ngaihtuah chhuah vote ruk lanna’ a nih thu an sawi bawk.
Gandhi-a hian Bihar-a a campaign lai khan BJP lakah vote ruk hi a aupui nasa hle a, mipui tam tak SIR kalpui hmangin an ru niin a puh a ni.