A upa zel a, tih theih loh chin a nei chho zel tih hai lo Jackie Chan chuan Bollywood Romance leh Dance film-a inlan theih ngei chu a lungkham lian leh hlawhtlinpui a duh ber a nih thu a sawi.
Action star anga hriatlar leh khawvel mipui tam tak hlimna thlen a, tinuitu hian Bollywood film-a a changtupa ni a, romantic taka inlan a, dance lam thlenga ram zauh a duh thu hi vawikhat mai ni lo a sawi tawh nghe nghe.
Kum 2017 khan Rush Hour actor hian a film thar, ‘Kung Fu Yoga’ tihlar nan India leilung a rawn rap a; Bollywood star pathum- Sonu Sood, Disha Patani leh Amyria Datsur te telna film tihlarnaah action film-a inlan reng mai chu a kham tawh hle a, engtik ni ah emaw chuan romantic film hmuhnawm tak chan ngei a duh, a ti.
“Bollywood director thenkhat hnenah min sawm turin ngenna ka siam a, action film siam ka hne deuh tawh. Lam ka duh a, love story chan ka thlahlel.
“Keima lam atang chuan theihtawp ka chhuah na a, script nen inmil chiah lo a awm thin avangin a tak ram a thleng thei ngai lo.
“Kum 16 a liam ta reng mai a, engtikah emaw chuan Bollywood romantic film-ah inlan ngei ka tum fan a ni,” a ti bawk.
Kum 71 mi Jackie Chan hi 1960s vel atang tawh khan lemchan khawvelah a zuang lut a, tun thleng hian film 150 chuangah a inlan a, a chuai thei mawlh lo.