Aizawl: Central YMA hruaitute leh Aizawl City Local Council (ACLC) hruaitute inkawmin, ILP chungchangte, dan lova hnamdang sumdawng tam ta lutukte, Aizawl khawpui chhung kawng siam mek en zui chungchangte leh ruihhlo do chungchangte an sawi ho.
Tuikhuahtlanga Central YMA pisa-a nimin tlaia an inkawmna hi Central YMA President R Lalngheta’n a kaihruai a. An inkawmnaah hian ruihhlo do chungchangah YMA leh Local Council te tanho a tulziate, YMA leh LC ten hriatpuina lehkha leh NoC pek chhuah chungchangah fimkhur taka kalpui a tul thu te sawiho a ni.
ACLC President C. Lalbiaknunga chuan, YMA-in ruihhlo do kawnga khawtlang tana tha tura an ngaih chu local council-in lo dodal loh pawh a that thu a sawi.
Central YMA President R Lalngheta pawhin ruihhlo do kawngah chak takin hma lak an tum a, LC te tawiawmna an mamawh dawn tih a sawi.
An inkawmnaah hian ACLC President C. Lalbiaknunga leh hruaitu dang pali an tel a; Central YMA President R. Lalngheta leh OB dang pali an tel bawk.