Aizawl: MJA Gen Headquarters leh IPR,P&S Department huaihawtin ram puma chanchinbu mite Ni, ‘National Press Day’ chu Thawhtanni khan Mizoramah hman a ni.
November 16 hi National Press Day a ni a, Pathianni a nih avangin nimin khan hman a ni a. Aizawlah chuan I&PR Auditorium, Treasury Square-ah hman a ni.
Khuallian IPRP&S Department Betsy Zothanpari chuan chanchinbu mite chu sorkar tha tichak zel tur leh mipuite zirtir tura an dinhmun pawimawhzia chu hriaa thahnemngai taka an eizawnna kawngah theihtawp chhuah zel tur leh khawvel hmasawn zelah mi tam takin chanchinbu chu hriatna rintlak ber a an ngaih pakhat a nih angin an thuthar an puan chhuah leh dan thuah pawh fimkhur leh thuhnu dawn taka mipuite hnena puang chhuak thin turin chanchinbu mite chu a chah.
IPR, P&S Dept. Director K. Vanlalsangi kaihhruai inkhawmah hian MJA President C. Lalrambuatsaihatn inlawmna thu a sawi a. I&PR Deputy Director Pratap Chhetri-a’n National Press Day 2025 thupui, digital huna print media dinhmun (The role of print Media in the Digital Age) thupui a buatsaih an zir ho a. MJA Vice President C. Lalhmachhuana’n lawmthu sawiin hun hi a khar a ni.
Inkhawmah hian khuallianin Mizoram buai laia inremna atana thawhhlawk tak, L.R. Sailo leh MJA member zinga mass communication-a doctoral degree nei hmasa ber, Dr. Lalnunkimi Colney-te hnenah chawimawina thilpek a hlan bawk.