Aizawl: Information & Public Relations Minister B. Lalchhanzova’n sorkar laipui rinchhan ngai lutuk lova inrelbawlna an kalpui theih nan kawng hrang hranga chhiah pek ngaite an ngaih pawimawh a tul thu a sawi.
Thawhlehnia Ministry of information and Broadcasting hnuaia Press Information Bureau buatsaih, One Day Media Conclave ‘Vartalap’ thupui hrang hrang zirhona hun a hmanpuinaah B Lalchhanzova chuan ‘One Day Media Conclave’-a zir tur thupui zingah ‘GST Reforms 2025: Relief for Common Man, Boost for Business’ chu Mizoram tana zir tur thupui pawimawh tak a nih thu a sawi a. Ram tihhmasawn nan leh ram leilung fate thinlungah neitu nihna thinlung, ram hmangaihna rilru kan put tlan theih nan chhiah hi hmanraw tangkai tak a nih thu a sawi.
Supply minister ni bawk, B Lalchhanzova chuan chhiah hmanga ram siamthat hna kalpui a nih theih nan Land Revenue & Settlement Department-ah pawh chhiah lak dan kalphung thlak danglam a nih thu sawiin, “Sorkar laipui rinchhan ngai lutuk lova inrelbawlna kan kalpui theih nan kawng hrang hranga chhiah pek ngaite kan ngaih pawimawh a tul,” a ti.
Khualzahawm, Commissioner of State Tax HK Lalhawngliana pawhin Mizoramah chak lehzuala chhiah khawn hna kalpui mek a nih thu leh, dik tak leh a hun taka chhiah lakkhawm a nih theih nan ‘Quick Response Team’ pawh din a nih thu a sawi. September 2025 atanga hman tan, GST 2.0 kalpui a nih hnuin Mizorama chhiah lakkhawm a than zel thu a sawi a. Mipui hnenah, a hun tak leh dik taka chhiah pek pawimawhna hrilhhriat kawnga thawhpuiah, Media Conclave chhimtute zawng zawng chu a sawm bawk.
He hunah hian Nampibou Marinmai, IIS, Director (News), Doordarshan Kendra, Aizawl in thu a sawi a. Mizoram Journalist Association, ICFAI University leh Mizoram University zirlaite an tel bawk.