Aizawl: School Education Minister Dr Vanlalthlana kaihhruaiin School Education Department Quarterly Review Meeting vawi 6-na neihah, academic document lem zawn chhuah chhunzawm zel a nih tur thu sawi lan a ni.
Planning & Programme Implementation Conference Hall-a meeting-ah hian zirna in tlawh chhuaha en dik dan tur chungchangte, zirna hmanga zirlai naupangte ruihhlo leh zuk leh hmuam laka fihlim tura inkaihhruai dan tur chungchangte, zirtirtu hna dil tana syllabus hman tur bik duan chungchangte, district inrelbawlnaa Sub-Divisional Education Officer-te Samagra Shiksha Office-a mawhphurhna pek chungchangte, HSLC leh HSSLC result siam dan phung tha zawk turte, Samagra kalphung thar tur Samagra 3.0 chungchang leh academic document lem zawn chhuah chhunzawm dan tur chungchangte an sawi ho.
Meeting-ah hian academic document lem hmanga sorkar hna dil leh thawk tawh zingah academic document lem hmang thenkhat hmuh chhuah an nih thin thu leh, hrem leh ban an nih dante sawi lan a ni. School Education Department hnena document rinhlelhawm thlentu an tam avangin chak leh zuala hma lak a tul thu sawi lan a ni bawk.
Review meeting-ah hian Education Consultant bakah School Education Department hnuaia office hrang hrang, Secretariat, Directorate, MBSE, SCERT, Samagra Shiksha, Mizoram Language Development Board (MLDB), DIET leh district official-te an tel.