AZL: Larsap General (Dr) VIjay Kumar Singh chuan Mizo khawtlang chu tunhma atang tawha thawhhona tha nei a nih avangin Mizoramah cooperative hlawhtlin lohna chhan tur a awm loh thu a sawi.
International Year of Cooperatives 2025 puala NABARD Mizoram Regional Office-in ‘Cooperatives Build a Better World’ tih thupui hmanga an buatsaih, Cooperative Conclave 2025, Hotel Regency Conference Hall, Aizawla neih chu larsap hian a hmanpui a. Mizo khawtlang chu tunhma atang tawha thawhhona tha nei a nih avangin Mizoramah cooperative hlawhtlin loh chhan tur a awm loh thu a sawi a. Hmanrua, inkaihhruaina leh hmalakna enzuina tha bakah tun aia taima lehzuala tanlakna hmangin cooperation harh tharna hlawhtling tak an kalpui thei tih a sawi.
India chu khawvela cooperative inzarpharhna ram lian ber a nih thu leh society 8,40,000, member vaibelchhe 29 awmna a neih mek thu sawiin larsap chuan, MPACS, FPO leh SHG te tha taka an kaihhruaia, thil dehchhuah hralhna tha tak an ruahmansak phawt chuan kawng hrang hrangah hmahruaitu an ni thei a ni, a ti a. Thlai thar chhuahte a hringa hralh mai bakah, a sawngbawlna lam an uar deuh deuh a tul thu sawiin, organic thla thar chhuah tam deuh deuh a tul thu a sawi.
Larsap chuan March 31, 2026 ral hma ngeia MPACS 216 din hman a nih ngei a beisei thu a sawi a. MPACS tum a hlawhtlin theih nan hmeichhia leh thalai tam zawk an tel a tul thu leh ram leilung tichhe lo zawnga hmalak a tul thu a sawi bawk.