Aizawl: Dampa bial by-election-a thlan tlin, Dr. R. Lalthangliana, MNF Sr. Vice President chu Thawhlehni khan Assembly Speaker Lalbiakzama’n Mizoram MLA ni turin rinawmna thu tiamtirin a la lut.
Lak luh inkhawm hi Assembly Conference Hall-ah neih niin, Lalthangmawia, Addl. Secretary, Assembly Secretariat-in a kaihruai a. Assembly Speaker Lalbiakzama’n MLA thar, Dr R Lalthangliana chu India danpui hnuaiah rinawmna thu tiam turin a la lut a ni.
MLA thar lak luh inkhawmah Chief Minister Lalduhoma, Home Minister K. Sapdanga, Health Minister Lalrinpuii, School Education Minister Dr. Vanlalthlana, Assembly Dy. Speaker Lalfamkima, Leader of Opposition Lalchhandama Ralte bakah MLA dangte an tel a ni.
MLA atana Dr. R. Lalthangliana lak luh a nih hnu hian Mizoram Leagislative Assembly-a seat 40 awmna MNF chuan MLA 10 an nei ta a ni.
MNF Sr Vice President Dr R Lalthangliana hi term ruk zet MLA ni tawhin, heng zinga term thum — 1998 – 2003, 2003 – 2008 leh 2018 – 2023-ah te cabinet minister a ni a. Kum 1989 – 1993, 1993 – 1998 leh 2008 – 2013 khan MLA a ni.
Dr R Lalthangliana hi tun by-election nen chhiar telin MNF ticket-in MLA atan vawi sarih thlan tlin a ni tawh a. Kum 1989 khan a vawi khat nan Lunglei North bialah thlan tlin niin Lunglei North bialah vek hian kum 1993, 1998 leh 2003 khan thlan tlin leh a ni. Kum 2008 khan Lunglei West bialah a tling leh a, kum 2018 khan South Tuipui bialah thlan tlin a ni tawh bawk.
Kum 2023-a 9th Mizoram Legislative Assembly inthlanpuiah khan South Tuipui bialah MNF ticket-in a ding leh a, thlan tlin ni lo mah se, Dampa bial by-election neih zawh takaah thlan tlin a ni.