School of Nursing, Thingdawl-in nimina an school auditorium-ah 7th Capping & Lamp Lighting Ceremony leh Graduation Programme an buatsaih hmanpuitu, Health Minister Lalrinpuii chuan nurse-ten ram danga hna an hmuh zung zung theih nan tawng zirna kawngah Mizoram Youth Commission (MYC) nen tangkawpa hmalak tum a nih thu a sawi.
Health minister chuan zirlai chhuak turte leh capping ceremony hmangtu zirlai tharte hnenah lawmpuina leh duhsakna a hlan a. Zirlaite chu an hmaah tih tur tam tak an nei tih sawiin, nurse hna chu hna zahawm leh ropui tak, mi dangte tana rawngbawlna hna pawimawh tak a ni a. Amaherawhchu, an pawimawhna chuan mawhphurhna lian tak a keng tel a ni tiin, inthlahdah lo turin a chah.
Nursing profession tihchangtlun nan sorkarin hma a la mek a, hna tam tak computerised a nih theih nan ngaihtuahna a sen mek thu sawiin minister chuan, nurse-ten ram danga hna an theih nan tawng zirna kawngah MYC nen tangkawpa hmalak tum a nih thu a sawi a. Zirlaite chu Mizoram pawn mai ni lo, foreign thlenga hnathawk ngam tur leh ruihhlo laka fihlim tlat turin a chah bawk.