Aizawl: Mizoram Larsap General Vijay Kumar Singh leh Chief Minister Lalduhoma te chuan Pathianni khan Mizoram Catholic Kohhranin kum 100 an tlin lawmna puala kumtluana programme hrang hrang an kalpui kharna inkhawm, Bishop’s House Compound, Ramthar Veng, Aizawla neih an telpui.
Larsap General Vijay Kumar Singh chuan Catholic Kohhranin Mizoram khawtlang nun, rinna leh ngaihtuahna siam dik kawngah a thawh hlawk hle tih sawiin, vantlang rawngbawlna, hriselna, zirna leh kohhran dang nena inremna leh thalaite tihhmasawn kawnga an hmalaknate fakawm a tih thu a sawi a. Kohhran member-te chu inpekna nena rawngbawlna chhunzawm tura chahin, thalaite nun kawng dika hruai tura kaihhruaina tha pe turte, tunlai thiamnate hmang tangkai turte, muanna leh inpumkhatnate chawilar zel tur leh mi rethei leh hnuaihnungte rawngbawl sak kawnga inpekna thar nei turtein a chah.
Chief Minister Lalduhoma chuan Catholic Kohhran avangin Mizoramin sorkar din ni lo high school hmasa ber, St. Paul’s High School an nei a, zirna in tha tak tak dang tam tak an nei zui zel a, tunah chuan hengte Mizorama school tha ber ber an ni hlawm a, India rama zirna school tha ber berte hi he kohhran enkawlte an ni, a ti bawk.
Lalduhoma chuan mirethei leh chanhaite chhawmdawlna kawnga Catholic Kohhran hmalakna fakawm tiin, Mizoramah pawh Zoram Entu Pawl (ZEP) kaltlanga hna ropui tak tak an thawh thin thu a sawi a. Catholic Kohhran member Mizo hnam tana mi hlu tak takte, ram hruaitu leh mi hmingtha tam tak an chherchhuah thu a sawi bawk.
He hun hi School Education Minister Dr. Vanlalthlana chuan a telpui bawk.
Mizoram Catholic Kohhran hi February 1, 1925 khan din a ni a. Tun dinhmunah hian member 20,000 chuang an awm a ni.