I&PR Minister B Lalchhanzova’n zirlaite leh Mizoram zirnain hma a sawn phahna tur a nih chuan tun laia sawi hlawh tak, MBSE syllabus tihdanglam thlenga hmalak a tum thu a sawi.
MZP General Headquarters buatsaih MZP Inter High School Quiz 2025 chu Zirtawpni zan khan Ignite Studio-ah zawh fel a ni a. He hun hi Minister B. Lalchhanzova chuan khuallian niin a hmanpui a. Thu sawiin, zirnaa hlawhtling tur hian eng harsatna mahin mi tumruhte a dang zo ngai lo tih a sawi a. Zirlaite leh Mizoram zirnain hma a sawn phahna tur a nih chuan tun laia sawi hlawh tak MBSE Syllabus tihdanglam thlenga hmalak a tum thu a sawi a. Zirlai harsatna tawkte tana MZP thil tih ‘Students Aid Fund’ siam chu ropui a tih thu a sawi.
MZP President Dr. C. Lalremruata pawhin thu sawiin zirlaite chu lehkhabu chhung chauh ni lova an zirlai piah lam thil te pawh chhiar a hre zau deuh deuh turin a fuih a. MZP-in Student’s Aid Fund a siam chu zirlai harsate tana buatsaih a nih thu sawiin sum harsatna avanga zirlai zir chhunzawm duh ngawih ngawihten an zir zawm thei lo thin chu MZP chuan pawi a tiin, an harsatnate sukiang turin Students’Aid Fund hmanga puihna pek an tum thu a sawi bawk.
MZP Inter High School Quiz 2025 neih zawh takah CLS Academy chuan lawmman pakhatna lain, pawisa fai Rs 30,000 bakah thuziak leh trophy an dawng a. Mt Carmel School chu pahnihna niin, Rs 20,000 bakah trophy leh thuziak an dawng a, St. Lawrence School chu pathumna la in, Rs 10,000 bakah Trophy leh thuziak an dawng bawk.