Aizawl: P&E Minister F Rodingliana’n small hydel project thenkhat mi dang kuta sorkarin hlan a tum chu Mizoram tana hlawkna tur zawk a nih thu sawiin, tun dinhmun anga enkawl chuan a hma anga hluihlawn leh vek mai hlauhawm zawk a nih thu a sawi.
ZPM-in an party pisaa chhung inkhawm nimina an neihah thusawiin P&E Minister F Rodingliana chuan, Mizoramah hian Hydel Project 23 lai siam tawh niin, chung zinga 11 chu chhan hrang hrang avangin hluihlawn a ni tawh avangin, project pasarih hi mi dang kuta hlan turin tura tender a ni a, heng zinga project pathumte phei chu kum rei tak hman lohin a lo awm tawh tih a sawi.
F Rodingliana chuan mi dang kuta hlan tum zingah Khawiva (1.05 MW), Teirei (3 MW), Kau Tlangbung (3 MW), Kawlbem (4 MW) an tel lo va, heng project-te hi chu department-in a la enkawl zui dawn tih sawiin, “Tuna small hydel project midang kuta hlan tur hi department chuan Mizoram tan hlawk hle turah kan ngai a. Lo hlan lo ta pawh nise, tun dinhmun anga kan enkawl hi chuan a hma anga hluihlawn leh vek mai a hlauhawm zawk,” a ti.
Tun laia small hydel project midang kuta hlan chungchangah data dik tawk lo hmanga mipui hruai kawi thei tura thu chhuah awm chu pawi a tih thu sawin, mi pakhat RTI zawhna behchhana siam niin a hriat a nih thu F Rodingliana’n a sawi a. Serlui B SHP hian kum 10 chhunga a unit thar chhuah zawng zawng kha Rs. 5.83 an puntir ta ringawt niin a hriat a, a senso chipchiar ziak lang si lovin thuchhuah an rawn siam ve tawp nia a lan thu a sawi.
“Tuna kan dinhmun atang chuan project kan neihte hi a maintenance leh a thawktute hlawh kum tin a pun zel avangin enkawl zui hi thil hlawk ber a nih loh avangin tuna kan thutlukna anga kal hi sorkar tan chuan a tha ber a. Mi dang hnena hralh chhawng tur kan ni lo a, kum 25 chhung a hlawkna telin mi dang kan enkawl hawhtir dawn a ni zawk,” a ti.
Minister chuan kawlphetha intodelh tura hmalaknaah, Tuirini SHP (24MW) hi chak taka hma lak mek niin, finance-tu tur pawh tihfel a ni tawh tih a sawi a. Tuivai hi CWC ruahman dan chuan 210 MW a ni a, an sorkar tirh khan DPR siamna turin Central-ah an zuk dil a, Rs. nuai 180 lai a rawn pe a, hemi hmang hian DPR chu peih fel a ni tawh thu a sawi a. Tlawng HP hi CWC ruahmanna hmasaah chuan 54 MW install capacity tura ruahman a nih thute, Vankal Solar plant bakah Solar Power lamah hian kum 2-3 chhungin 100-150 MW thar chhuak thei tura hma lak mek a nih thute a sawi bawk.