Lai Autonomous District Council (LADC) inthlan lo awm turah MNF Treasurer Lalruatkima chuan ZPM party tih loh political party dangten an party-in candidate an neih lohna bialah chuan thlawp an dawn niin a sawi.
Nilainia LADC inthlan tur chungchangah Thawhtannia Aizawl Press Club-a thuthar lakhawmtute a kawmnaah MNF treasurer chuan zawhna chhangin, “Tual chhungah inremsiamna (local arrangement) neuh neuh a awm a, Congress-in bial 14 an chuh a, a bak bial kuaa candidate an neih lohnaah min thlawp an tum thu an sawi a, chutiang bawkin BJP pawhin bial 10 an dinna bak min thlawp an tum niin kan hria a, kan lawm hle a ni,” a ti.
LADC-a bial 25 awmah bial 20 chuh mah se sorkar siam tura lak ngai zat, 13 chuang daihah candidate an nei a, sorkar siam turin an inring tawh a, “Kan confi’ hle a ni,” a ti.
Rka chuan Dampa biala ang bawkin rorel lai, ZPM chu candidate an in-set hlum leh niin a sawi a “Candidate an puan khan lawm vanga au thawm aiin thinrim inhrosa thawm a ring zawk,” a ti a. Candidate chang loten independent-in an din thuah thliah a, an member an bang nasa hle niin a sawi bawk.
Minister hlui, Rka chuan Lal Thanhawla kaihhruai Congress sorkar leh Zoramthanga kaihhruai MNF sorkarah ministry-ah dahin India flag tar thei dinhmunah dah an ni thin tih a awi a, “ZPM sorkar, Pu Lalduhoma kaihhruaiah chuan district council pathum atanga ZPM MLA tling awmchhun, Dr Lorrain Lalpekliana Chinzah chu ministry-ah dinhmun tha luahtir a ni lo va. Hei hian Lai district mai ni lovin autonomous district council-te an ngaihthahzia leh a ngaih pawimawh lohzia a tilang chiang hle,” a ti.
Lairama tlawngai pawl lian ber, Central YLA-in an duh loh, Forest Conservation (Amendment) Act, 2023 chu ZPM sorkarin legislative assembly-a pawmpui luitua puhin ‘hnawl ngam turin MNF chuan Lairam mipuite leh Lai fate kan ngen’ tih a sawi bawk.
LADC inthlanah hian ZPM-in bial 25 awm chuh kim vekin MNF-in 20, Congress-in 14, BJP-in 10 leh independent-a ding 11 an awm a. Nilainia vote thlak a nih hnuah Thawhlehniah vote tlate chhiar a ni ang.