Aizawl: Pachhunga University College leh MGH Korea chuan Thawhlehni khan PUC-a Korea tawng zirna hawng turin inremna thuthlung an ziak a, nakkum January 27 hian class tan hman tum a ni.
Principal Conference Hall-a MoU ziahna inkhawmah hian PUC Principal Prof. H. Lalthanzara chuan, “NEP 2020-ah hian zirna inte chu international level-a lang thei tura tan la turin a duh a, Korea tawng zirna hawn pawh chumi kawngah chuan a pawimawh hle a ni,” a ti a. PUC chuan zirna in hrang hrangte nena thawhhona neih a ngaih pawimawh thu leh Korea ram zirna inte nena thawhhona an la neih ngei a beisei thu a sawi bawk.
PUC-ah hian MGH Korea hian zirtirtu tirin tawng a zirtir dawn a. |awng zir tur hi beginner level a ni ang a, thla thum zir tur niin a fee hi Rs 10,000 a ni ang. Zirna hmun tur leh an mamawhte a lo ngaihtuahsak bakah zirlaite admission te lo tihsak thung dawn a ni. A zir man chungchangah hian Prof. H. Lalthanzara chuan, “Hmun dangah chuan Korean Beginner level course atan hian Rs 15,000 te lak thin a ni a, Mizoram tan bik fee hi an ti tlem a ni,” a ti.
Inremna thuthlung hi PUC aiawh Prof. H. Lalthanzara, Principal leh MGH Korea aiawh Kim Jungae ten an ziak a. MGH Korea hian Canada, India leh Myanmar-ah te Korea tawng zirna an buaipui a, an ram sorkar atanga phalna nei an ni. An hotupa Dr Sangjoon Lee hi Hanyang University-ah industrial engineer zirtitu niin Samsung leh LG-ahte quality control lamah a lo thawh tawh bakah company hrang hrangah pawh tawnhriat a nei a ni.
PUC hian October 28, 2025 khan Japan tawng zirna hawng turin JACEEX LL Ltd. Guwauhati te nen thawhhona thuthlung an lo ziak tawh bawk.