AZL: Lai Autonomous District Council (LADC) inthlanpui chu Nilaini hian neih a ni dawn a, zing dar 7 atangin vote thlak tan a ni ang.
Lawngtlai khawpui leh a chhehvela LADC inthlanpui neih turah polling station 111 awmnaa inthlanna buaipuitu tura hmun hla zawka duty tur polling party 59-te chuan Thawhtanni khan an duty-na tur hmun an pan tawh a, Thawhlehni khan hmun hnai zawka duty tur polling party 52 ten an duty-na hmun tur, Lawngtlai DC Office tual atangin an pan bawk.
LADC inthlanpuiah hian Electronic Voting Machine hman tur niin, vawiin zing dar 7 atangin mipuiin an aiawha LADC a rorel tur thlangin vote an thlak tan ang.
MDC bial 25 awmna LADC-ah candidate 80 awmin, ZPM chuan bial awm zawng zawng bial 25 an chuh kim a. MNF-in bial 20-ah candidate neiin, Congress-in bial 14-ah candidate an nei a, BJP-in bial 10 candidate neiin, Independent-a chuh mi 11 an awm bawk.