Aizawl: Chief Minister Lalduhoma’n Thenzawl chu ramngaw siam thar kawnga chak zawka hma an lak a ngaih thu leh hnathawhna tur sum an neih thu a sawi.
Mizoram CAMPA Governing Body chu Nilaini khan an chairman Lalduhoma, chief minister hovin CM Conference Hall-ah an thukhawm a. Chief minister chuan ramngaw siam thar kawngah chak zawka hma an lak a ngai a. Hnathawhna tur sum an nei tih a sawi.
Chief minister chuan Mizoram a lo mawi deuh deuh theih nan state tree Herhse hi uar a, ramngaw siam thei thlai, kuthnathawktute tana tangkai si, rubber ang chite pawh uar a tul tih a sawi.
Thenzawl chu Peace City atana master plan siam mek a nih thu sawiin chief minister chuan, “Rel kawng kalna tur hi an rawn tichiang thuaiin a rinawm bawk a. Heng thilte hi tihfel a nih hma chu Thenzawlah hma lo lak rih loh ni se, tihchhiat leh mai tur hmalakna kan lo kalpui palh kha a hlauhawm a ni,” a ti.
Thutkhawma tar lan a nih danin kum 1990 atanga kumin thlengin Mizoramah forest ram hectare 11,768.8909 a zau chu Non-forest area-ah chantir a ni tawh a. Heng ramngaw an tihchhiat rulh lehna tur hian hmasawnna hnathawktu ten danin a phut angin PARIVESH portal kaltlangin National CAMPA-ah pawisa an chhunglut thin a. Ramngaw rulhna tur an chhun luh zaa 90 chu National CAMPA hian hnathawhna state Compensatory Afforestation Fund (Public Account) ah a dah luh leh thin a ni. Tuna Mizoram State Compensatory Afforestation Fund, component hrang hrang belhkhawm awm zat chu Rs. 2,12,15,38,556 a ni.