Ruihhlo kalkawnga awm, ruihhlo avanga thalai tam tak liam zawih zawihna ram kan ni mek. Heti tak maia ruihhloin kan ram min nghaisa ta mai hi a pawi a, a veiawm a, thapui tak meuh thawha tanlak a va tul em.
Mizoram Excise & Narcotics (MEN) department sawi dan phei chuan December ni 2 thleng khan kuminah ruihhlo vangin mi 83 in nunna an chan tawh a, kum 21 hnu, kum 2005 hnua kum khat chhunga ruihhlo vanga thi an tam ber a ni leh mek!
Ruihhlo hmansual hi a nasa telh telh a, khawvel ram hrang hrang pawhin an buaipui mek lai leh thapui an thawh mekna a nih avangin keini pawh hian tan kan lak zual a tul a, khawvel ruala ke kan pen ve sauh sauh zel hi a ngai tak zet tawh.
Ruihhlo hlauhawmzia hi naupang zawkte atanga a zira kan zirtir hi a tul tawh a, kum tlin hma atanga khawihte pawh an awm tawh hial! Hemi a nih avang hian a hlauhawmzia hi kan zirtir a, kan sawi a, ti lo tura kan inhrilh mawlh mawlh hi mitin hna a ni.
Sorkar hian thapui thawhin thawk se la, ruihhlo ngaite hi a nuihsawh zawngte hian kan en te pawh hi a tul hun a la awm mai awm e. A ti lo tur zawnga ke kan pen a, a hlauhawmzia kan sawi mawlh mawlh a, mipuiah hian zirtirna kan pek a, sorkar a chet hmanhmawh viau zel a tul e.