Brazilian centre back Thiago Silva fapa Isago Silva chuan a pa club hlui Chelsea-ah a professional contract hmasa ber a ziak a, kum 17 mi defender lakah Blues hian beiseina an nei sang hle nia sawi a ni.
Centre back leh left back-a khel kawp thei Isago hian a unaupa Iago Silva nen, kum 2020-a an pain Paris St Germain atanga Chelsea a zawm khan London club academy hi an zawm ve nghal.
Isago hi Chelsea Under-13 team-ah ziah luh niin, season hmasa khan Chelsea U18 tana a match hmasa ber a khel der tawh a. Blues chuan thuchhuah siamin, “Isago hi defender rintlak tak, left back leh centre back-a chhawr kawp theih a ni,” an ti.
Kum 17 mi hian Chelsea U17 leh U18 tan khel kawpin, U18 tan bik hian Premier League Cup U18 a khel – kum 41 mi ni tawh, a pa Thiago Silva tawnhriat zahve lek a tawng thei a nih pawhin footballer hlawhtling tak a ni ang!
Brazilian club Fluminense tana khel mek Thiago hian Brazil tan match 113 ngawt khelin, Copa America leh FIFA Confederations Cup-ah champion nomawi a lakpui a. AC Milan tan Serie A leh Supercoppa Italiana nomawi lain, PSG tan Ligue 1 (7), Coupe de France (5), Coupe de la Ligue (6) leh Trophée des Champions-ah te a champion a, Chelsea tan Champions League, FIFA Club World Cup leh UEFA Super Cup-ah a champion bawk.