Aizawl: Dampa bialtu MLA Dr R Lalthangliana’n thlan tlin a nih avangin a bial chhung khaw hrang hrang – Kanghmun, W. Lungdar, Lungphun, Hreichuk, Khawrihnim, Reiek, Ailawngah Ningani khan lawmthu sawiin a fang kual a. South Sabual-in an khaw kum 250 tlin lawmna a hmanpui bawk.
Lawmthu sawia bial a fanna Dr R Lalthangliana chuan, tun tum Dampa bial by-election chu Mizoram UT hun lai atang tawha inthlan an neih tawh zawng zawngah Mizoram, India leh khawvel hmun dang atang pawha ngaihven hlawh ber nia a hriat thu a sawi a. America, Myanmar leh Bangladesh atang pawhin phone a dawng nasa hle a, a chhan ni bera a rin chu Dampa bial by-election hian kum 2028 MLA inthlanpui a hril thui hle dawn a, heta tling chu mipuiin sorkar ngei tura an ngaih vang a nih thu a sawi.
South Sabual khuain December ni 3 atanga ni 5, 2025 chhunga an khaw kum 250 tlin lawmna an neih mekah, ni 3 zan khan bialtu MLA Dr R Lalthangliana’n khuallian niin a hmanpui bawk a. Sabual chu Mizoramah khaw upa berte zinga mi nia a hriat thu leh Mizoramah hei aia upa a awm a hriat loh thu a sawi a. South Sabualin zirna kawngah te, ram leh hnam leh kohhran rawngbawlnaah mi hmingthang leh chhuanawm chhuah tawhna khua a ni tih sawiin, he khuaa nung dama la awmte hian an khua leh Mizoram tan eng thil tha leh hlu nge an hnutchhiah zel dawn tihah chona tha tak nei turin a chah a ni.