Aizawl: Chief Minister Lalduhoma chuan Mizo hmanzia leh tihphungah hmeichhiate thliarna a tam lem lo va, hnam dangte nena khaikhinin a ziaawm pawl tak an nih thu a sawi.
Women & Child Development department buatsaihin Ningani khan Aizawl Sumtual, MINECO-ah Mission Shakti hnuaia State Hub for Empowerment of Women (SHEW)-ah Chief Minister Lalduhoma chuan hmeichhe zirlai naupangte a kawm a. Thusawiin Chief Minister chuan, ZPM sorkarah Mizoram chanchina Cabinet Minister atana hmeichhia nei hmasa ber an ni a. Hei mai ni lovin MLA dang, Baryl Vanneihsangi chuan ram rorelna sang ber Assembly Session a kaihruai tawh tih a sawi.
Lalduhoma chuan a hmasa ber atan Gender Budget an nei bawk a, officer-te zingah hmeichhia an tam hle a, sorkar office tinah hnathawktu zingah hmeichhia an tam deuh zawk zel a, sumdawnna hmunte chu hmeichhiate enkawl deuh vek an ni a. Mizoram pumah mipa aiin hmeichhia vote nei a tam zawk a, hmeichhiate chu mipate aiin an thi tlem zawk zel thin tih sawiin, Mizo hman zia leh tihphungah hmeichhiate thliarna a tam lem lo va, hnam dangte nena khaikhin chuan a ziaawm pawl tak an nih thu a sawi.
Chief Minister chuan Mizoram sorkarin hmeichhiate venhimna leh chawikanna kawnga theihtawp a chhuah reng a. Tunah pawh hian Working Women Hostel thar tur hi hmun pasarihah an sak mek thu a sawi bawk.
Social Welfare minister Lalrinpuii chuan hmeichhiate humhimna leh chhawmdawlna scheme hrang hrang awmte hrechiang duh tan engtik lai pawhin 181 (toll-free) ah a call thin theih reng thu a sawi.
Inkhawmah hian St Paul’s Higher Secondary School, Govt JL High School, Govt. Chawnpui High School, Neuhof English Medium School leh Mount Carmel School atangin zirlai hmeichhe tleirawl thlanchhuah te an tel a ni. Zawhna hrang hrang an neih chu CM-in a chhansak a, an inkhawm zawhah Aizawl Sumtualah hian thing a phun bawk.