Aizawl: NABARD atanga sum hmuh, Rs. nuai 258.89 senga sak ni zung chakna hmanga alu chi dah thatna tur chu Agriculture Minister PC Vanlalruata’n Thingdawl Agriculture Farm-ah Ningani khan a hawng.
Solar Powered Cold Storage hawnna inkhawmah PC Vanlalruata chuan Kolasib district chhunga department hrang hrangte hmalakna hriat nuam a tih thu leh lawmawm a tih thu a sawi a. Kuthnathawktute harsatna lian tak pakhat chu a hun taka thlai chi tha hmuh a ni thin lo hi a ni tih sawiin, “Alu chi tha pawh a hun taka kan hmuh thin loh avangin kan thar chhuah tur ang kan thar chhuak thei lo va, a hun taka a chi kan hmuh theih chuan kan thar tam ngei a rinawm,” a ti.
PC Vanlalruata chuan kuthnathawktute harsatna a hriatthiampui thu sawiin, farmer-te tan theihtawpa hma an lak thu a sawi a. Cold storage hawn tak pawh chu kuthnathawktute tana hmasawnna ruhrel pawimawh tak a nih thu sawiin, an mamawh zawng zawng phuhruk lo mah se, eng emaw chenah a puih theih ngei a rin thu a sawi a. Agriculture leh a kaihhnawih department-te tanrual a pawimawh thu leh, hmasawn tur chuan tunlai khawvel thiamna chhawr tangkai a tul thu a sawi bawk.
Hawnna inkhawma khualzahawm, Deputy Speaker Lalfamkima, bialtu MLA ni bawkin thu a sawi bawk.