Chief Minister Lalduhoma chuan loan pe chhuak tlem bank thenkhat, national benchmark phak lo leh lutukte chu en liam mai chi nia an ngaih loh thu sawiin, CD Ratio nei hniam ber bank pakhat chu insawi fiah rang turin a hriattir.
Mizorama sorkar hriatpui bank awm zawng zawngte intawhkhawmna leh an hnathawh thlirletna, ‘State Level Bankers Committee (SLBC),’ Aijal Club-a Ningani-a neihah Lalduhoma chuan chief minister a nih hnua SLBC a telpui tum hnihna a nih thu sawiin, thutkhawm hmasa atanga tehin hmasawnna duhawm tak tak hmuh tur chu lawmawm a tih thu a sawi.
Chief minister chuan a bikin CD Ratio nei tha bank pathum – MRB, SBI leh Apex Bank chungah lawmthu a sawi a. Chutihrualin bank thenkhat, loan pe chhuak tlem leh lutuk, national benchmark phak lo leh lutukte erawh hi chu en liam mai chi ni a an ngaih loh thu sawiin, CD Ratio nei hniam ber, 5.30% chauh tlin phak bank pakhat chu a hnenah insawi fiahna thehlut rang turin a hriattir tih a sawi.
Mizoram sorkar chuan mi tin ban phakah bank-te hi inzar pharh turin an duh tih sawiin chief minister chuan, tuna branch an neih mek 278 zinga 183-te hi Aizawl, Lunglei leh Kolasib-ah an awm a. A dang 95-te hi district dang pariatah an inzar pharh a. Tunah hian he SLBC leh RBI hnenah bank-te inzar pharh dan hi lo ennawn a, thingtlang mipuite banphaka intizau turin a ngen tih a sawi.
Mizorama bank branch tam takah thawktu an tlem thin avangin mipui tan an tangkai tur angin an tangkai zo lo thin a. Hnathawktu indaih tawk tak dah tum theuh turin bank thuneitute hi a ngen bawk.
Chief minister chuan Mizoram sorkar flagship programme Handholding Partner Bank atan bank pathumte chu inremna an ziahpui a, tha taka an thawhpui chuan an mamawh an phuhru zo turah an ngai a. Mahse, Mizoram State Policy Coordination Committee hnuhnung ber report-ah khan an partner bank-te handholding loan hi zaa 42 te hnenah chauh vawiin thlengin an la pe chhuak a. Sorkarin chak taka kalpui an duh avang partner bank neih belh mai hi thaa an hriat thu a sawi.
Bank-te hi an sum dawn (deposit) tlingkhawm atanga teha zaa 60 tal mipuite hnena puktir (advance) tura beisei an ni a. Hei hi an hnathawh tehna langsar taka hman a ni thin. Tun SLBC report-a a lan danin, YES bank, Bandhan bank, SSFB, AXIS, HDFC, ICICI leh CBI te CD ratio chu zaa 31 aia hniam vek an nih thu, sorkar thuchhuahin a tar lang.