Aizawl: Kumin chhungin Mizoramah Covid-19 hri kai 40 hmuhchhuah a ni a, thihpui erawh an awm lo.
Integrated Disease Surveillance Programme (IDSP)-in an tar lan danin, kuminah hian Covid-19 hri kai inring an sample endiktir eng emaw zat an awm a. Heng zingah hian mi 40 chu hri an kai tih hmuhchhuah a ni.
Hri kai hmuhchhuahte hi hri kai tih lang chhuak an awm meuh lo a, na tak pawh an awm lem lo niin an sawi.
Kumin chhunga hri kai hmuhchhuah hnuhnung ber chu September 16 kha a ni a, September 22-a enkawl dam a nih hnuah Mizorama Covid-19 kai hmuhchhuah emaw, kai lai mek emaw an awm tawh rih lo a ni.
Kum 2020-a Covid-19 kai leh kai lo endik tan a nih atanga Zirtawpni thleng khan sample 19,98,247 endik a ni tawh a. Chung zinga mi 2,39,675 chuan an kai tih hmuhchhuah a ni a, an zinga mi 734 te chuan an thihpui a. Thite hi upa lam leh natna benvawn chi hrang hrang nei sa an ni deuh vek a. Hrikai zinga mi 2,38,941 te chu enkawl dam an ni.