Mizoram Agricultural Marketing Board tar lan danin, nakkum February 2 atanga May 30 chhung sawhthing leina atangin support price pek a ni dawn a, sawhthing leina atanga support price pek tur chu primary society member-te thar chhuahah chauh pek a ni dawn a, bag tinah sawhthing neitu hming, khua, phone number leh ration card number thil tel tur a ni.
Buffer Stock Point siam a ni tawh dawn lo va, Secondary Collection Centre (SCC) atangin sawhthing hi hralh chhuah vek tur a ni a, sawhthing bag-a a chhinchhiahna chilh telh loh chu lei loh tur a ni a, support price dawn beisei lote chuan an duh dan ang leh tha an tih angin engtik lai pawhin an hralh thei thung a ni.
Hmunphiah ro pawh sorkar chuan ZOHANDCO kaltlangin grade-a then lovin kg khat Rs. 80-in February 2 – March 31, 2026 chhungin SCC-ah an lei dawn a. Hmunphiah chingtuten kg khat Rs. 80 emaw, a aia toa hralhna an hria emaw, ZOHANDCO hnena hralh kher an tum lo emaw a nih chuan tha an tihnaah an hralh thei bawk.