Agriculture Minister PC Vanlalruata chuan ram danga dan lova lei tihthatna (fertilizer) thawn chhuah thin titawp turin nasa taka hma a lak mek thu sawiin, kuminah dan lova sumdawnna atana hman tur urea bag 5,424 leh DAP bag 300 man a nih tawh thu a sawi.
Inrinni khan lo neitute hman tur lei tihthatna phurtu lirthei chu agriculture minister hian Ch. Saprawnga Truck Terminal, Rangvamual atangin a vai liam a. Sorkar laipui thuchhuah zawmin Mizoram chuan agriculture department kaltlangin thlai chinna ram zau zawng mil leh thlai chinna leilunga thlai chaw awm zat milin sorkar laipuiah report a pek thin thu leh kum tin sorkar laipui atangin Mizoram chanvo fertilizer lo neituten tlawm taka an lei theih tur a dawn thin thu a sawi.
PC Vanlalruata chuan Mizoram quota fertilizer hi a chanvo neitu lo neituten MRP ngeia an lei theih nan leh hnianghnar taka an hmuh theih nan sorkar chuan theihtawp chhuahin ram danga dan lova thawn chhuah thin titawp tur hian nasa takin hma a lak mek thu a sawi a. District hrang hranga fertilizer inspector, police leh magistrate-te nen tangkawpin heng dan lova lei tha thawn chhuak thinte uluk taka vil reng an nih thu a sawi a. Kuminah lei tha dan lova sumdawnna atana hman tur urea bag 5,424 leh DAP bag 300 zet man a nih tawh thu a sawi bawk.
Agriculture minister hian lo neituten man man zawk, hnianghnar leh an mamawh huna fertilizer an hmuh ngei theihna turin Mizorama fertilizer dealer pakhat MAHFED Ltd. kaltlangin urea bag 11,200, TSP bag 1,800 leh MOP bag 1,000 a vailiam a. Heng MAHFED Ltd. hnuaia fertilizer zawrh chhuah turte hi a mamawh tak takten an lei theihna turin vil zui reng a ni dawn a. Fertilizer hi sorkar ruahmanna angin MAHFED Ltd. kaltlang chauha lei theih tur a ni.