Aizawl: Tourism Minister Lalnghinglova Hmar chuan Home stay an uar dawn tih a sawi.
Nimina ZPM party-in an pisaa chhung inkhawm an neihah thusawiin tourism minister chuan tunah hian tourism project khawih mek leh thawh hmabak, sanction awm tawh an neih zat belhkhawm chu Rs nuai 34,990.9 a ni a, hei bakah Mizorama tourism project lian ber zinga mi ni thei tur, sum lian tham pawh a lo luh zel an beisei mek thu a sawi.
Heng project aia a ngaih pawimawh leh tourist hip tura a ngaih zawk chu khualzin an lawm dan, an dawnsawn dan, an tlawh duh tur hmunhma an sawngbawl dan, an lo kal duhna tura ‘event’ an siam thiam danah a innghat ang tih sawiin Lalnghinglova Hmar chuan, “Sorkar hi sumdawng a ni lo a, hlawk a tum lo a, mipui hlawk se a duh. Home stay kan uar dawn a, Bana Kaih hnuaiah Homestay Scheme kan duang a, CSR atangin pawisa hlawm lian deuh home stay atan kan nei dawn bawk,” a ti.
Event an nei tha sawt hle a, vantlang mipui bu tan Community base tourism an duh tih sawiin Tourism Minister chuan, “A hlawkna mipuiah kal rawh se. Hnahsin Kut-ah kan lawm em em – sorkarin Rs nuai 30 chuangin a pui. Stall inhralhna Rs nuai 200 a tling a, mipui nuai chuangin an tlawh a, pawisa che vel Rs vbc 15 vel niin an chhut,” a ti a. Hotel, Guest House, Home Stay thleng zat Mizoram chhungah 5100, India ram state dang mi 805, India pawn mi 56 an tling tih a sawi a. Leitlangpui, Winter Festival (Krismas theme-in an kalpui dawn), Anthurium Festival (Horti nen), Sakawrhmuituai Sunset (December 31), Phuaibuang Paradise (Jan 6&7), Aizawl International Half Marathon (Feb 14), Chapchar Kût te an hmabak a la nih thu a sawi bawk.