Lai Autonomous District Council (LADC) inthlana vote tlate chu nimin khan chhiar zawh niin, party mala sorkarna siam thei an awm lo a, sorkar lama tel ngei tumin party tinin ruahmanna an siam chho mek niin a lang.
Kan hriat theuh angin Mizoramah ADC pathum awmin, hengahte hian state a sorkar laite an tlingzui thei viau mai a, sorkar-na siam tham an awm thin a ni a, tunah erawh boruak inthlakin, state-a sorkar na chelhtu ZPM hian seat 6 chauh an la phak a, inngaihtuahzui an ngai viauin a rinawm.
Hetih lai hian seat la tam ber MNF chuan seat 8 lain, INC in seat 7 an la ve bawk a, BJP leh Independent candidate te chuan seat 2 ve ve an la bawk. Sorkar na siam thei tur a la chiang ta lo a ni.
ADC bik hrim hrimah hian sorkar an insiksawi nasa theiin, term laklawhah seat inthlak kual a nasa thei hle a, party tana thlantlinte meuh pawhin an thutthleng an hung sawn duh thin lai hi tam tak chuan an vei a, sorkar ngelnghet a awm theihna turin tun tuma LADC inthlanah pawh hian Central Young Lai Association (CYLA) chuan sorkar nghet an duh thu an lo aupui hial tawh a ni.
Engpawhnise, mipuiin kan thlir leh ber an ni tawh a, eng pawh sorkar se, sorkar nghet, nghing lo tur awm turin in siam thei se la, hnathawh leh hmalakna pawh a chak zual sauhin a rinawm bawk.