Inthlan result puan a nih tawh chuan sorkar siam tur a hriat a, ruahmanna fel tak nen sorkar thar inrelbawl dan tur leh kal dan tur an inremkhawm a ni ngai a, thlantlinte chuan anmahni chan theuh pawh an hre thuai tawh thin.
Mahse, Lai Autonomous District Council (LADC) inthlanah erawh party mala sorkarna siam thei an awm loh avangin result puan ni tlai atangin campaign an tan leh nghal a, party hrang hrangin campaign rusum an thlak uar sauh thung.
Tangrual party siam a ngaih miau avangin thawkho tur an ruahman a, party hrang hrangin sorkarna siamtu lama tel ngei tumin thawhhopui tur an zawng nasa nghal hle a, nizan thleng khan engmah chiang a la awm thei lo.
Tarlan tawh angin seat 25 awmna LADC inthlanah hian MNF chuan seat 8 lain, INC in seat 7, ZPM in seat 6, BJP leh Independent in seat 2 ve ve an la a, heti chung hian sorkar siam dan tur a la chiang thei chuang lo.
ZPM lam hi an party president chuan awmchilhin, MNF leh INC hi an vice president te chuan result puan atangin an thutchilh bawk a, sorkarna siam lama tan tum vek an nia sawi an ni a, result puan hnu thlengin campaign a la zo thei lo a ni ber.
Engpawhnise, sorkar thar a din thuai beisei ila, sorkar ngelnghet leh tha ding turin party tinte pawhin theihtawp chhuah mawlh teh se.