Aizawl: AH &Vety Minister C.Lalsawivunga’n nimin khan Khuanglenga ar vulhtu hlawhtling chho mek John Lalrinchhana chu a hnathawhna Khuanglengah a tlawh a, Mizoram sorkar flagship programme – Bana Kaih tihhlawhtlin tum leh intodelh tuma theihtawp a chhuahna chu lawmawm a tih thu sawiin, a department chan atanga tanpuina awm thei ang angte pek a tiam a, sorkarin dawmkan a tum thu a sawi.
C Lalsawivunga chuan, “Intodelh hi kan thupui leh innghahna a ni a, chumi tihlawhtling tur chuan hand holding policy leh kawng hrang hrangin sorkar department tinin hma a la mek reng a ni. AH & Vety Department pawhin theih tawp kan chhuah a, Pu John Lalrinchhana’n intodelh mai ni lo, tam tak thawnchhuak thei hial tur khawpa a beihna hi a ropui ka ti. Helai hmun hi sorkar chuan kan ngai pawimawh em em a, ar vulh mai ni lovin a bul maiah hian sawhthing sawngbawlna siam tura kalpui mek zel a ni a, kum 2026 January-ah chuan zawh fel theih kan beisei,” a ti.
Minister hian sawhthing sawngbawlna tur hmun hi tlawh nghal a. He sawhthing sawngbawlna tur hmun hi a panna kawng metre 270 siam hna leh zauh hna thawh mek a ni a, tui litre nuai 10 dahkhawlna siam leh khawl chi hrang hrang chawm zo tur transformer khawl bun hnate chak taka kalpui mek a ni.