Parliament Winter Session neih mekah Rajya Sabha MP K Vanlalvena’n income tax certificate phutna Mizo-ten an dawng thin chu India dan kalh a nih thu a sawi.
Nilaini khan Parliament Winter Session-ah Rajya Sabha MP chuan thu sawiin India danpui hnuaia Income Tax Act section 10(26)-in a tar lan angin India chhunga tribal hnamte chu income tax awl an nih thu leh hemi a nih avang hian Mizo mipuite chu danpuiin chhiah a awl thu house-ah a sawi.
K Vanlalvena chuan tribal-te income tax awl a nih mek lai hian Mizo zingah Income Tax Certificate phutna thuchhuah Income Tax Office, Guwahati, Assam atanga hriattirna dawng an awm thin thu a sawi a. Mizote hi income tax pe ngai lo leh tribal an nih avanga awl an nihna certificate te, tribal certificate te chu Income Tax Official-te hnenah an entir hnuah pawh official-ten an la tibuai zui fo a, hei hi dan kalh a nih thu leh dan lova Mizo mipuite tihbuaina a nih thu a sawi.
Principal Chief Commissioner of Income Tax Office, Guwahati, Assam hnenah hriattirna pe tur leh a tul dan ang a action la turin K Vanlalvena’n Rajya Sabha chairman a ngen nghal bawk.