Aizawl: Chief Minister Lalduhoma chuan Mizoram ang state lian lo, tlangram chhengchhiaa awm, mawi si, a mi chengte lehkha thiam, taima leh talent nei tha bawk si tan phei chuan hmathlir (vision) tha neih a pawimawh zual tih a sawi.
Planning & Programme Implementation Department hnuaia State Institute for Transformation (SIT), Mizoram chuan NITI Aayog’s State Support Mission hmalakna peng pakhat atan Mizoram Assembly House Conference Hall-ah nimin khan ‘Transformed Mizoram Vision 2047 Roadmap Workshop’ a buatsaih a. He hunah thu sawiin chief minister chuan, Mizoram hmalam hun chungchang sawiho tura an nihnaah, hma hun sawi dawn chuan hmathlir atanga an tan a ngai a. An hmathlir chuan a hawi lam a kawh hmuh ang a, tih tur leh tih loh turte bakah an resource neih chhunte thiam taka hman dan tur a kawh hmu dawn tih a sawi.
Khawvelah hian eng ram mah hi hmasawn sa a piang a awm lo va, hmasawnna hi tihpalh thilthua lo awm pawh a ni lo v, kum tam tak sorkar leh ram mipui ten hmathlir neia an lo thawhchhuah rah a ni zawk thin tih sawiin chief minister chuan, “Mizoram te ang state lian lo, tlangram chhengchhia a awm, mawi si, a mi chengte lehkha thiam, taima leh talent nei tha bawk si tan phei chuan hmathlir tha neih hi a pawimawh leh zual a ni,” a ti.
Chief Minister chuan Mizoram hian hun kal tawhah harsatna tam tak a pal tlang tawh a, chuti chung chuan hmasawnna rahbi pawh nasa takin a tuk ve mek zel a. Amaherawh chu, an duh ang leh tum ang hmasawnna erawh an la nei lo tih chu an pawm tlan ngam a ngai thung tih a sawi a. India-in kum 2047 ral hmaa ram hmasawnte zinga inhlan kai ve tuma beihpui a thlakna kawngah Mizoram pawhin zinkawng thui tak a hmabak a, an tih hmasak tur chu governance leh delivery-ah hma an sawn a ngai, chumi tur chuan, productive sectors heng – Agriculture ang allied activities, industries, tourism leh digital economy-ah te hma an sawn a ngai a, chu chuan thalaite tan sum lakluhna leh employment a siam dawn tih a sawi a. India ram chhung leh pawn lamah pawh hna zawng thei tura thalai ten innovation leh technology-a thiamna an neih theih nan quality education and training hmang te a tahhriam an ngai tih a sawi.
Transformation hi programme thar siam ringawt a ni lo tih sawiin Lalduhoma chuan, “A tha lo kalsan ngam tura huaisenna nei te hi a ni. Mizoram tih hmasawn nana workshop pawimawh tak mithiam rual kalkhawmin in duan mek lai hian, Mizo identity innghahna tlawmngaina te, an rinna te, hnam nunphung leh ziarang te hi an hmasawnna chuan mausam lo se, hmasawnna chuan khawvel hmasawnte rualin ke min pen tir se, kan identity ti nghet zual sauh zawk rawh se,” a ti. Vision 2047 workshop chu paper-ah chauh tawp lo se a duh tih a sawi bawk.
Workshop-ah hian chief minister bakah DP&AR minister K.Sapdanga leh Minister dangte, Chief Secretary, sorkar department hotute leh sawm bikte an tel a. Workshop hian nileng a awh a, India-in kum 2047 ral hma a, ram changkang zinga inhlankaih ve tuma hmasawnna beihpui a thlakna, Viksit Bharat @2047 tinzawna Mizoram-in ‘State’s long-term development’ kawng a sial dan tur zirhona leh sawihona workshop a ni.