Aizawl: Art & Culture Minister C Lalsawivung chuan inthlan hmaa an intiam ang an tihlawhtling zel dawn a, mipuite hian an thawhrim rah chu ZPM sorkar hnuaiah an tel zel dawn tih a sawi.
Ningani chawhma khan Leng Zirna Centenary (1925-2025) lawmna kal mek chu Leng khua Saihnuna Hall-ah a lawmna pui ber neih a ni a, he huna khual lian Minister C. Lalsawivunga chuan, ZPM sorkar chuan mipui tan zirna tha, kawngpui tha, tui leh power-a intodelh bakah Healthcare system tha zawk leh hmasawnna rotling pek a tum mek zel tih a sawi a. Mizo mipuiten hma an sawnna tur leh khaw hrang hrang intodelhna tura flagship programme, Bana Kaih te, department hrang hranga hmasawnna tur ruahmanna an siamte a chhawr tangkai bertu ni turin Leng mipuite duhsakna a hlan tih sawiin, “Kalphung thar sorkar hi mi taima tan dinchhuahna tur sorkar a ni dawn,” a ti.
C. Lalsawivunga chuan mi taima tan ZPM sorkar hi dinchhuahna tham a ni dawn tih sawiin, “Inthlan hmaa kan intiam ang kan tihlawhtling chho zel dawn a, mipuite hian an thawhrim rah hi ZPM sorkar hnuaiah an tel zel dawn a ni,” a ti bawk.
Leng Zirna Centenary lawmna inkhawm hi Zairemmawia, VCP chuan kaihruaiin, khuallian hian Zirna Centenary lungphun a hawng a, centenary puala buatsaih souvenir a tlangzarh bawk.