Aizawl: Chief Minister Lalduhoma chuan lo neih chu Mizo hnam nunah thuk takin ber mah se, leilung chereu zel leh sik leh sa inthlak danglam avangin leh hmakhua a nghelngheh zawk nan technology changkang zawk hman a tul tawh tih a sawi.
Chief Minister-in Kolasib-ah ICAR buatsaih tlangram lo neih dan thiamna (technology) tlo hmanga Mizoram loneitute tichak tih thupui hmanga ‘Krishi Mela Cum State Level Farmers Workshop’ nimina a hmanpuinaah thu sawiin, Mizoramah hun rei tak chhung lo neih dan phung pangngai a lo hman tawh piah lamah, a tlo zawk leh science thiamna hmanga lo neih dan thar kalpui a tul thu a sawi a. “Lo neih chu Mizo hnam nunah thuk takin bet tlat mah se, leilung chereu zel leh sik leh sa inthlak danglam avangin leh kan hmakhua a ngelngheh zawk nan technology changkang zawk hman a tul tawh a ni,” a ti.
Chief minister chuan sorkar flagship programme ‘Banakaih- Handholding Scheme’ chungchang sawiin, hei hian eizawnna bul tan thar tumte hnenah loan hmangin tanpuina a pe a, lo neih leh sumdawnna bul lo tan tawhte tan ‘CM special package’ te siamsak an ni tih a sawi a. Aieng, hmarhcha, sawhthing, hmunphiah leh buh thar chhuahte hralhna man tha tak (price support) sorkarin a ngaihtuah sak tih a sawi bawk.
Loneitute, ICAR scientist-te leh thalaite chu ram leilung nen inlaichinna tha zawk siam a, Mizoram leilung chu eizawnna tlo leh hlawk zawk a chantir tur leh state intodelh din turin chief minister hian a sawm.
Inkhawmah hian khual zahawm, Mizoram Legislative Assembly Deputy Speaker Lalfamkima leh mi pawimawh dang dangin thu an sawi abawk.
December 11-12, 2025 chhung awh, he workshop-ah hian Line department hrang hrang, FPO leh lo neitu hlawhtlingten an thil thar chhuah pho lan nan stall 25 an hawng a ni.