GIG Motors chuan ni khat chhunga lirthei an hralh tam ber hun an hman hnuah rel lo lut chhawrin December chhungin car 500 hralh chhuak theih an inbeisei.
Kawngpui a ziaawm deuh hnu September atanga November thleng thla thum chhungin GIG Motors-in sorkarin lirthei hralh zat a chhinchhiahna Vahan-ah 818 an ziak lut a, kumin chhovah October kha an hralh tam ber niin Vahan-ah 285 an ziak lut a ni.
Inrinni khan Mizorama Maruti-Suzuki dealer chuan an hnuaia showroom pahnih Arena, Edenthar leh Nexa, Thuampui atangin car 48 an hralh tih an sawi a; August 23, 2017 khan GIG Motors hawngin heta tang hian ni khat chhunga an hralh tam ber a ni.
Chief Executive Officer John Lalpeka chuan kumin chhova kawng chhia avangin lirthei lak luh kawngah harsatna an tawk nasa a; mahse, tun thla atangin Sairanga rel rawn lut an chhawr thei dawn a; chuvangin, December chhunga 500 hralh thei turin hun tha an nei a, puitlin theih ngei an inbeisei tih a sawi.
Sairanga rel lut hian a tam berah wagon 25 a hnuk thei a, heng wagon zawng zawngah hian Maruti-Suzuki car 100 atanga 25 vel a phur thei dawn a. Rel bakah hian an kalpui dan pangngaiin truck-in a phur lut tel reng dawn bawk a, lirthei lak luh kawnga harsatna an neih thin an su kiang thei dawn.
Maruti-Suzuki dealer an nih atangin kum riat leh thla lina an hmang mek a, January, 2024 kha thla khat chhunga Vahan-a an ziah luh tam ber niin 346 an tlin a. Hetih lai hian Vahan-a an ziak luh leh thla khat chhunga an hralh zat dik tak hi inmil tawk lo a awm thei a, khawl lam fel lo avanga ziah luh hun tihkhawtlai leh thla tawp lama an hralh chhuah thla thara ziah luh ngai a awm thin bawk.