BJP chuan Pathianni khan Bihar Minister Nitin Nabin-a chu an party national working president thar atan an ruat.
“BP parliamentary board chuan Bihar sorkara minister ni lai, Nitin Nabin-a chu party-a national working president atan a ruat a ni,” tiin National General Secretary Arun Singh-a’n thu a chhuah a ni.
Working president ruat thar a ni tih puan a nih hnuah Prime Minister Narendra Modi-a chuan BJP hruaitu chu lawmpuina a hlan nghal a, a chakna leh a inpeknain an party chu a tihchak ngei a beisei thu a sawi.
“Pu Nitin Nabin-a hi Karyakarta thawk rim tak a ni a. A la thalaiin mi tiphur thei tak niin inrelbawlnaah tawnhriat tam tak nei niin MLA a nih lai leh Bihar-a minister a nih hun chhungin fakna tur thil tam tak a lo thawk tawh a. Mipuite thil mamawh hria a ni a, mi dawhthei leh a hniam ber atanga hna thawk mi a ni a, a theihna leh inpeknain hun lo kal zelin kan party a tichak ngei ang,” tiin X-ah a tar lang.
Nabin-a hi tun hnai lawka Bihar assembly inthlanah khan Patna district-a Bankipur bial atanga thlan tlin niin RJD candidate Rekha Kumari chu vote 51,000 chuangin a hneh.
Nitish Kumar-a sorkarah road construction leh urban development & housing minister a ni mek.
BJP hi an president tang lai, JP Nadda-a hun kha kum 2024 thleng kha a ni a; mahse, nikum khan Lok Sabha inthlan avangin a hun hi pawh sei a ni a. An danah chuan president hi a zawnin term hnih zel, term khat kum thum chelh theih a ni a. President hi national council leh state council-a member-ten an thlan thin a ni.
Nabin-a hian Nadda-a hnung a zui dawn em a la hriat loh va. Nadda hi June, 2019 khan Amit Shah-a a president laiin working president-ah dah a ni a. Shah-a union home minister a nih hnuah national president atan January, 2020 khan thlan a ni a. Nabin-a pawh hian Nadda-a hnung a zui mai rin a ni.
Nabin-a hian an party chu West Bengal, Assam, Tamil Nadu, Kerala leh Puducherry-ah assembly inthlan a hmachhawnpui dawn a ni.