December ni 3 a Lai Autonomous District Council (LADC) inthlanna result chhuakah tu party mah sawrkar siam khawpa chak an awm lo va. A tling tam ber MNF in seat 8 an la a, a dawttu Congress chuan seat 7 la in state a rorel lai ZPM chuan seat 6 an la a. BJP in seat 2 la in independent candidate 2 an tling bawk.
Hetiang hi inthlan result a nih tak avangin tute party emaw thawkho a sawrkarna siam a ngai ta a. A tirah inthlan hma atanga bial thenkhata lo inthurual MNF leh Congress chu sawrkar insiam tawm mai tura ngaih an ni. Mahse MNF party lama mi thenkhatin BJP leh Independent a tling pahnih nen, Congress party MDC pakhat thlem kawia sawrkarna siam rilruk an lo tum tih Congress lamin an han hriat ruk khan MNF nena thawhho chu ngam lovin an thawhhona an chhu chat zui ta a ni. MNF party vice president chuan hei hi thu tawp neitu an ni pha love tiin han pha mahse Congress tan pawm a har tawh hmel hle bawk a ni.
Congress leh ZPM lamin thawhhona siam an tum leh mek nia hriat a ni a. Inthlana thawhho aia har zawk chu lungrual taka sawrkar kalpui ho hi a niin a lang. Sawrkar inlungrual lo avangin LADC ah hian vawi tam tak rorel lai namthluk a lo ni tawh thin. Hei hi an ven lawk a ngai hle.
Congress leh ZPM pawh hi han thawkho se buaina tam tak a awm thei ang tih mek laiin tunah pawh hian an party ve ve inkar piah lamah party dang hlimthla a lang tel vuai vuai a. Hetiang anih phei hi chuan sawrkar ngelnghet neih a huphurhawm hle mai.
Kan ram politician te kutah Lai district sawrkarna siam hi a awm mek a. Lawngtlai lam chuan thu tawp an nei thei lova, an tih tur an ti zo tawh a. Sawrkarna nghet din leh din lohah kan party ten mawh an phur tawh a, he district-ah hian eng sawrkar pawh piang se a siamtu chu ZPM leh Congress hotute, MNF nena an thawkho anih chuan an hotute kutah a awm tawh a ni. Ngaihtuahna fim tak tak hmangin, Lai district mipuite hmakhua ngaiin ro han tel teh se.