Aizawl: Lok Sabha MP Richard Vanlalhmangaiha’n Zirtawpni khan Union Minister for Culture & Tourism Gajendra Singh Shekhawat chu a pisaah kawmin hmasawnna tura hmachhawp hrang hrang a sawipui.
Richard Vanlalhmangaiha hian Mizoramah Tagore Cultural Complexes (TCCs) din a nih ngei theihna atana hmalak dan tur a sawi pui a. Tagore Cultural Complex hi state dangah te din a lo ni nual tawh a, an tangkaipui hlawm tak zet thu union minister chuan Mizoram MP hi a lo hrilh a, Mizoramah pawh din ve ngei a nih theihna turin hmalakpui a lo tiam bawk.
MP Richard-a hian Mizorama culture & tourism department hnuaia hmasawnna ruhrel hrang hrang kalpui mekte tihhlawhtlin a nih vat theih nan chak leh zual zawka hma la turin a ngen nghal bawk a, union minister pawhin project hrang hrang awmsa te pawh a rang lama lo bawhzui a nih tur thu a lo hrilh.
Zirtawpni tlai vek khan Tibet MP-ten Richard Vanlalhmangaiha hi a chenna inah an kawm a, harsatna neihte leh India atanga an thil beiseite chu a hlawhtlin theihna turin MP hi theihtawp chhuahpui turin an sawm bawk.