Aizawl: Synod inkhawmpui Rorel Inkhawm chuan ruihhlo ngaite enkawlna hmun Jordan Centre, Sethawn chu enkawl a remti.
December 13, 2025-a Zarkawt Presbyterian Kohhran biak ina Rev. John Raldosanga, Moderator, kaihhruaia Synod Inkhawmpui rorel ni 4-na inkhawmah, ruihhlo ngaite enkawlna hmun Jordan Centre lak chungchang ngaihtuaha sawi ho niin, tha tih a ni a. Thil tulte chu Synod Executive Committee (SEC) bawhzui atana tih a ni.
Kumin September thla liam ta lam khan Sethawna ruihhlo ngaite enkawlna hmun Jordan Centre enkawl tura Mizoram Synod-in duh dan an neihte chu Mizoram sorkarin a lo pawmpui tawh a. Jordan Centre enkawl chungchangah hian a neitu department, Social Welfare department chuan Synod hotute an dawr a, an enkawl duh leh duh loh an zawt a. Synod chuan a hmunhmate enfiahin, a zir chiang tur committee-te an ruat a ni.
Zir chiangtuten an zir chian hnuah Synod chuan Jordan Centre enkawl tura duh dan an neihte Social Welfare department-ah an thlen ve leh a, sorkarin a lo pawmpui a ni.
Hetih lai hian Jordan Centre an enkawl dawn leh dawn loh hi SEC-ah rel a ni a; Synod Inkhawmpui-ah chhawpchhuah zui leh niin, enkawl turin remtih a ni ta a ni.