Aizawl: Thawhhona kawng dapin Tourism Minister Lalnghinglova Hmar leh Assam Tourism Minister Ranjeet Kumar te chu Inrinni khan Guwahati-ah an inkawm.
State pahnih tourism minister-te hian tourism hmasawnna tura thawho an rem ti a, hun remchang hmasaah thawhhona thuthlung ziah an tum a ni.
An inkawmnaah Lalnghinglova Hmar chuan Mizoramin tun hnaiah tourist a neih tam thu leh heng khualzin zinga a tam ber hi Assam atanga zin an nih avangin Assam sorkar nena tourism hmasawnna kawnga thawhhona neih tul a tih thu a sawi chu, Assam tourism minister hian tha a ti a, a official-te nen an sawiho nghal a ni.
Assam Tourism Minister Dass pawhin tun hmaa state pakhata chengho vek an nih avangin Mizoram chu an tan state hrang a ni lo va, Mizoram tlawh chu Assam miten an châk a, rel a awm tawh bawk nen, mi thahnem zawk an kal zel a beisei tih a sawi.
Mizoram tourism minister chuan, “India-a state tê leh mipui tlemna kan ni a, chutihlaiin khualzinin an tlawh duh leh ngainat state nih tuma inbuatsaih mek kan ni. He state hian a mamawh chu partner tha a ni a, hla taka mite nena thawhho aiin Assam nena thawhho hian tourism hmasawnna tura rah tha a chhuah kan ring tlat a ni,” a ti.
Lalnghinglova Hmar chuan Assam tourism hunpui buatsaihah Mizoram tourism chawi larna tur thlalak leh video-te a remchan anga tilar ve thin tura ngenna a thlen chu tihhlawhtlin an tum tur thu an hrilh bawk.
An inkawmnaa tel ve Kumar Padmapani Bora (IRS), Managing Director, Assam Tourism Development Corporation (ATDC) chuan Mizorama tour operator-te tan Guwahati-ah workshop an buatsaih theih thu te, Mizoramin ATDC kal tlanga tourism-a puih a tulnaah an inhawn reng thu a sawi bawk.