Lai Autonomous District Council (LADC) inthlanna a chak bik awm lo va sawrkar intawm siam a ngai ta chuan Mizoramah BJP a pawimawh tawhzia a rawn hailang chiang leh ta. Ruling party ZPM leh Congress party chuan sawrkar intawm an siam theih reng laiin ZPM lam chuan BJP chu kaihkuah tel a duh a, an thawhhonaah BJP an tel loh chuan central mit an ti kham ang tih an hlau tih a chiang hle.
Sawrkar intawm siam turin Lawngtlai a thlan tlin tak ZPM MDC te leh Congress MDC te chuan lungrual taka thawhho an rel fel hnuah Aizawl lama ZPM hotute chuan an inremna chu pawm lovin an MDC zawng zawngte chu Aizawl lamah ko phei vekin thudang an rel pui ta a. Ni 14.12.2025 khan Berawtlang a tourist center-ah MNF party MDC te nen inhmuhkhawmna neih puiin thawhhona an rel leh ta thung a ni.
Kar liamta chhunga sawrkar siamna tura party te an indawr kual chhung khan ZPM hotute chuan BJP atanga thlan tlin MDC te chu Congress nena thawhhopuiah sawmin an thlem ngar ngar a. Mahse, BJP MDC te hian Congress nena thawhho chu an remti thei ta lova. An tel lovin sawrkar siam thei mahse state a ZPM sawrkar chuan a ngam ta ngang lo a ni.
Hei hian kan state sawrkar nihna dik tak a tarlang chiang hle. Kan sawrkar chu central BJP sawrkar thununna hnuaia awm, ti rawh u an tih apiang chu pawm nghal duak duak mai an ni tih a pho lang a. Kan state mipuiten kan hnam himna khawih ni ngeia kan hriat Forest Conservation Amendment Act pawh mipui sawisel luih luih chunga adopt lui ngat kha an ni a. Tun boruak atanga thlir chuan ZPM sawrkar chu kan hnam tana pawi thei lakah pawh i-he lova BJP thu thu a kal zel, BJP uibuk anih a chiang lehzual awm e.
BJP hi a tawng a puiin kan tan an hlauhawm nghal ngawt dawn lo. Mahse ideology nghet tak India ram hi Hindu sakhaw betute ram chauh a nih theihna tura beitu an ni tih ka hre vek a. He ideology hian engtikah nge kan hnam leh sakhua chu a chimral ang? Kan theih ang tawka kan inhum a ngai ti reng chunga kan hotute an thuhnuaia an kun tlat chuan he hnam leh sakhua hian boral a hmabak hla lo hle ang.