Aizawl: ZPM President Lalliansawta chuan ram siam tha tak tak tur chuan inremna siam a ngai fo thin a, LADC-ah pawh party ni lovin Lairam an ngaihtuah zawk a ngai tih a sawi.
Thawhtannia an party pisa-a chhung inkhawmah thusawiin ZPM President Lalliansawta chuan, “Politics-ah thian hlun a awm theih lo va, hmelma hlun a awm thei lo an tih hi a dik khawp mai a, ram siam tha tak tak tur chuan inremna siam a ngai fo thin. LADC-ah pawh party ni lovin Lairam kan ngaihtuah zawk a ngai,” tia sawiin, LADC-ah sorkar ngelnghet tak din turin duhsakna a hlan.
Mizoram leh a chhunga thil awm zawng zawng hi Lalpa ta a ni a, Pathian rawngbawl nan an hlut a, an duat a ngai tih sawiin Lalliansawta chuan, “He ram enkawl turin Pathianin ZPM party-te min ruat a, a duh dan anga hna kan thawh a ngai. A hnena kan dilna chhanin a awm a, a duh danin ram kan kaihruai ve thung tur a ni. Kan hna theuh hi Pathian rawngbawlna a ni a, nihna a sang emaw, a hniam deuh emaw, keimahni zawn theuha ram siam that hna thawk turin rilru kan siam thar a ngai. Political party-ah ka awm a nih chuan chumi hmang chuan Pathianin ram siam turin min ko tih hi hriain nasa zawka Pathian rawngbawl turin i in buatsaih deuh deuh ang u. Krismas leh kum thar hlim taka hmang turin ZPM Party mipui leh Mizo mipui zawng zawng duhsakna hlan a ni,” a ti bawk.
Inkhawmah hian LADC inthlan zawh taka ZPM atanga MDC thlan tlin tharte lawmpuina hun hman niin, lawmpuina thilpek leh parthi hlan an ni.