Aizawl: Mizorama sports coach-te intuai tharna tur, ‘Transforming Sport for the Next Generation: Developing Decision Makers’ tih chu Thawhtanni khan Sports Minister Lalnghinglova Hmar-in Hawla Indoor Stadium, Republic Vengthlangah a hawng a; Japan mi thiamten zirtirna an pe thin dawn a ni.
He coach inzirna hunpui hi Mizoram State Sports Council, Nippon Sports Science University leh JICA tang kawpin an buatsaih a ni a. Mizo coach-te zirtirtu turin sports lama mithiam Prof. Masamitsu Ito, Nippon Sports Science University, Tokyo atangin a lo kal a, Tanako Ayako, Project Coordinator-in a tawiawm a, December 18, 2025 thleng kalpui a ni ang.
Sports Minister Lalnghinglova Hmar chuan, “Khawvel huapa sports lama mi thiam leh zirtirtu tha Mizoramin kan chang ve thei mai hi a lawmawm takzet a, a man pek tur ni se kan pek theih loh turin a thlawna zirtirna a rawn pe thei hi kan lawm takzet a ni,” a ti a, Mizo coach-te chu thahnemngai taka inzir turin a chah.
“Zirlai tha nei tur chuan zirtirtu tha neih a ngai a, coach tha kan neih chuan sports lamah hma kan sawn thei ngei ang tih kan ring. Tuna kan awm dan ngai reng a nih hi chuan kan result a ngai reng dawn a, kan intuaihriam a, hmasawn kan tum a ngai. India-in hma a sawn a, chu hmasawnnaa kan tel ve loh chuan National Games-ah pawh 28-na bawr velah kan tei kan tei reng a nih hi,” tiin infrastructure mai ni loin sports coaching chu chawi san a tul thu a sawi.
JICA, India Senior Representative Eiji Wakamatsu leh a thawhpui an kal bawk.