Tripura atanga Mizorama gas pipeline phum mektu, Indradhanush Gas Grid Limited (IGGL) Chief Executive Officer Subrata Das leh a thawhpuite chuan Thawhtanni khan Chief Minister Lalduhoma a pisa-ah a kawm a, an hnathawh chinte a sawipui.
IGGL thawktute sawi danin pipeline hi Tripura-a Panisagar Receiving Terminal atanga kal tanin Kanhmun, Zawlnuam, Kawrthah, Tuidam leh Darlak paltlangin Mamit bulah a chhuak a. Lengteah kal zelin Sihhmuiah Receiving Terminal dah tur a ni a. Receiving Terminal atanga Aizawl chhung household connection hi Tripura Natural Gas Corporation Limited ten an thawk ang.
Sihhmui thleng pipeline hi km 119.5-a thui niin feet khat bial a ni a. December, 2027-a thawh zawh hman an tum a ni a. Welding hna zaa 45 an thawk tawh a, a phum hna (lowering) zaa 33 an thawk tawh.
Project hi North East Natural Gas Pipeline Grid hnuaia hmalakna niin Panisagar leh Sihhmui inkar hi phase II hnuaia hmalakna pakhat a ni a. Phase II hmalakna pum hian Guwahati – Agartala – Aizawl pipeline a huam a, a vaiin km 723 a ni.