Aizawl: MPCC chuan Lai Autonomous District Council (LADC) inthlana MDC tling tharte lawmpuina hun an hmang a. He hunah MPCC Vice President C Ngunlianchunga, MLA, MDC tling thar leh LADC Congress Legislature Party leader ni bawk chuan thu a sawi a, sorkar mai turin Aizawl-ah kal mah se, van hmuna thlarau sual hote avangin an sorkar dawn leh dawn loh an hre ta lo tih a sawi.
C Ngunlianchunga chuan “Helai a kan rawn kal hian sawrkar mai turin kan rawn kal a; mahse, van hmuna thlarau sualhote avangin kan sorkar dawn nge, dawn lo kan hre ta lo va. Sorkar siam tur hian ZPM nen agreement kan siam a, sorkar siam dan tur pawh agreement-ah kan ziak vek a ni,” tiin, an inbiaknaah leader a chuh loh thu leh a chuh ngai loh thu a sawi a. CEM leh minister a nih dawn pawha a chuh loh thu a sawi.
Social media-ah ‘Congress-in MNF an bum a, ZPM-in Congress an bum ve thung’ a hmu tih sawiin, “ZPM hian min bum kan hre lo va, kan inremna a tawp tih pawh kan la hre lo a ni. MNF nen khan inthlan hma khan inremna kan nei a, kha kan inremnaah khan inthlan hma chauh nise, inthlan hnu lam chu la sawi that leh turin kan ti a ni. Kei ngei pawhin inthlan hma khan Congress candidate awm lohnaah chuan MNF candidate vote turin ka ti a ni. Mahse, social media-ah chuan MNF vote vek turin ka ti ni awmin an sawi leh a, chutiangin ka ti lo a ni. MNF hi kan bum lo va, inthlan result puan hnu khan inbiak pawh kan inbia a ni,” a ti.
“MDC din hi ka tum lo va, MLA ni lai ka ding a. ka tla a nih chuan a mualphothlak hle dawn a. Kan party atanga kan pafaa ding tura nawrna a nasa em em a, chhungkua kan inrawn a, kan tawngtai a, ding lo turin thu kan titlu a. MDC candidate turte pawh kan president-in thuneihna min pek angin ka approve a ni nghe nghe. ZPM-in Vengpui candidate an han puang kha veng chhung mi, party hrang hrang atang khan ding tura min nawrna a nasa em em a, kan hnar thei ta lo a ni,” tiin MDC candidate a nih chungchang C Ngunlianchunga’n a sawi bawk.