September thla khan Mike Tyson leh Floyd Mayweather te inhnek tur thu an sawi ri tawh a, engtik hunah nge an inhnek dawn tih erawh sawi lan a ni rih lo a. Tun hnaiah a hun tur hi an puang a, March, 2026 khian Africa khawmualpuiah an inhnek dawn niin an sawi.
Tun hnaia an kawmnaah Tyson chuan Mayweather nen an inhnek hun tur hi a sawi chhuak a, Africa-ah an inhnek dawn tih sawiin an inhnek hun tur chu March, 2026 a nih thu a sawi bawk.
Tyson-a chuan, “Kan inhnek hun tur chu March, 2026-ah a ni dawn a, kan inhnekna hmun tur chu Africa-ah a ni ang,” a ti.
“A nuam dawn khawp mai a, a ropui viau bawk ang. Record thar kan siam nual ang a, boxing huanga inhnek ropui ber a ni ngei dawn a ni,” a ti bawk.
Tyson leh Mayweather te hi an rih zawng a inan loh avangin catchweight dan hman a ngai dawn a. Engtin tak nge an inhnek hunah hian dan an hman dawn tih chu sawi a la awm rih lo a, Jake Paul nen an inhnek tuma round khat minute hnih zel ang kha a ni dawn nge dawn lo tih pawh an la sawi rih lo a ni.
Kum 59 mi, Tyson hi a vanglai chuan heavyweight boxer zinga rothap ber tia sawi thin niin, ‘Iron Mike’ tih hming lem an vuahsak a. Professional record pawh a nei tha a, vawi 50 a chak a, heng zinga 44-te hi a knockout a, vawi sarih a chak lo.
Kum 20 a nihin heavyweight title a la tan a, heavyweight champion ni thei naupang ber record a siam nghe nghe.
Kum 48 mi, Mayweather chuan a vanglaiin professional boxing-ah hneh loh a nei lo a, vawi 50 zet a chak thei a. ‘Money’ Mayweather hian weight category hrang hrang pangaah world title a la thei a ni.
Inhnek a chawlhsan hnuah Tyson chu exhibition-ah a inhmang leh nual tawh a, a inhnek hnuhnun berah chuan a che fuh vak lo va. November, 2024 khan YouTuber thin, boxer ni zui ta, Paul nen Arlington, Texas-ah an inhnek a. Entu mipui 70,000 vel zet an awm bakah pay-per-view-ah maktaduai chuangin an en a, round riat inhnekah a chak lo a ni.
Chak lo zawk ni mah se Tyson chuan mi a la hip hnem tho a, tuna Mayweather nen inhnek tura ruahman a nih pawh hi ngaihventu an tam leh hle.
Mayweather chuan kum 2017 khan UFC star Conor McGregor chu a hneh a, he mi hnuah hian inhnek a chawlhsan zui a. A chawlh hnuah hian exhibition-ah a inlan ve zeuh zeuh a, Japanese kickboxer Tenshin Nasukawa te, YouTuber Logan Paul te pawh a hnek tawh a, August, 2024 khan Mexico-ah John Gotti III a hneh a, hei hi a inhnek hnuhnun ber a ni.