Aizawl: Mizoram Consumers’ Union Headquarters-in nimin khan 28th Annual General Meeting-cum-Consumer Awareness Campaign an hmang a. FCS&CA Minister B. Lalchhanzova’n khuallian niin a hmanpui.
Central Hall, Venghluia inkhawmah khuallian B Lalchhanzova chuan, Consumers’ Union hmalakna hi phungthlu taka hlenchhuah chi a ni lo tih sawiin, “Hawihhawm tak chunga thil tidiklo te hremna pek ngam a tul a, kan hnathawh hlutna hi mual eng kil phalo, sawi saktu nei ve lo ten a parzu an chhim pha tur a ni,” a ti.
Consumer-ten an chanvo dik tak an chan thatna hmuna Zoram din tum tura palai kalkhawmte fuihin, an hnathawh an hlenchhuah hian Pathian rawng an bawl a ni tih hre thar turin a chah a. Mi tinin thil diklo hi ngawihbopui lo se, thil diklo ngawihbopui chin hi midawihzep te awmdan a ni a, mihuaisen leh hawihhawm te chuan thil dik lo hi an hmachhawn ngam thin tih a sawi.
Annual General Meeting-cum-Consumer Awareness Campaign hun thumah then niin, hun khatnaah hian FCS&CA Minister B. Lalchhanzova leh FCS&CA Director Saizikpuii ten an hmanpui a ni.
Hun hnihnaah hian H. Lalbiakpuia, General secretary, Mizoram Consumers’ Union Headquarters buatsaih ‘Consumer Awareness on Telecommunication’ leh Thanglura, President, Mizoram Consumers’ Union Headquarters buatsaih ‘Awareness on Consumer Protection Act and Liquefied Petroleum Gas (LPG)’ an zirho a, hun thumnaah an President Thanglura kaihhruaiin ro an rel a ni.