Aizawl: Kum 1971-a India-in Pakistan a hnehna champha, Vijay Diwas chu ram chhung hmun dangte rualin Mizoramah pawh Thawhlehni zing khan hman a ni a. Chief Minister Lalduhoma hovin War Memorial, Treasury Square-ah sipai huaisen, ram tana nun hlantute hriatrengna leh zahna lantirna hun hman a ni.
Chief Minister Lalduhoma chuan hma hruaiin, sipai huaisen martarte zahna lantir nan War Memorial-ah pangpar a dah a, Home Minister K. Sapdanga, Lt. Col. Clement Lalhmingthanga (Retd.), MLA & President, MESL te, Khilli Ram Meena, Chief Secretary, Sharad Agarwal, DGP Mizoram, Vanlalmawia, Home Secretary, Padma Shree Hav Lalbiakthanga, President, World War-II Veterans Association leh mi dangten pangpar hi an dah zui a ni.
December 16, 1971 khan Dhaka khawpui, Bangladesh-ah India sipai hotu Lt. Gen. Jasgit Singh Aurora kaihhruai sipai hmaah Pakistan sipai lalber, Lt. Gen. Amir Abdullah Khan Niazi leh a sipai 93,000 te chu India laka tlawmin an inpe a. He hnehna vang hian East Pakistan, tuna Bangladesh tia thlak tak hian Pakistan atangin zalenna a hmuh phah a ni. He ni hriatrengna atan hian kumtin Vijay Diwas hi India ram hmun hrang hrangah December 16 hian hman thin a ni.