Aizawl: PMJVK sum hmanga sak tur Aizawl Zotlang venga Mara Boys Hostel-ah Mara Girls hostel sakna tur te, MADC huam chhunga school thar pariat sakna leh school awmsa paruk chei tharna tur lungphum chu Thawhlehni khan Chief Minister Lalduhoma’n a phum.
Lungphum phum puala inkhawmah chief minister chuan heng zirna in hrang hrang sakna tur lungphum phum a ni ta chu Mara mipuite tana hun chhinchhiahtlak, Mizoram tana zirna lama hmasawnna pakhat a tlinga a hriat thu a sawiin, a puitlin hunah chuan Mara zirlai 3,200-ten tangkai takin an chhawr zui thei dawn tih a sawi.
Chief minister chuan tuna an hmalaknate hian MADC an ngaihthah lohzia leh hmeichhiate chawikanna kawnga hna an thawhzia a tilangah a ngaih thu a sawi a. Mara thalaite hian zirna an uarin an ngaihlu thin tih chu MPSC exam result atangin a lang chhuak thin a. Chuvang chuan, zirna lama duhsak hi an phua a hriat thu a sawi bawk.
ZPM sorkarah chuan hna muang te, hna chhiate leh a huna zawh lohte hi pumpelh an tum tlat tih sawiin chief minister chuan, “Hnathawh tinreng viltu tur, mipui huapzo Project Monitoring Committee kan nei a, vawiin thlengin project 87 an endik tawh a. Endik tur an an lakhawm zel bawk,” a ti a, tuna a lung an phumte pawh hi tha taka an thawh ngei theih nan an vil zel tih sawiin, a hun taka zawh pawh an tum tlat dawn avangin, hnathawktuten chak takin hma la turin a chah.
He hunah hian MADC CEN M. Laikaw chuan Siaha atanga online-a zawmin thu a sawi a. Siaha bialtu MLA Dr. K. Beichhua pawhin thu a sawi bawk.
Inkhawma tar lan a nih danin, Girls hostel hi RCC, chhawng ruk leh khum 120 leh Dormitory bakah Conference hall nei tur a ni a. Rs. vbc 8.07 senga sak tur a ni a. School building thar pariat hi Rs. vbc 5.76 senga sak tur niin, RCC, a chung rangva, building pakhatah room 12 zel awm tur a ni a, School paruk thuam thar hi Rs. vbc 8.59 senga thawh tur a ni a, smart class room dah tur a ni.